کراچی(پاک ترک نیوز ) وزیر خزانہ محمد اورنگزیب نے کہا ہے کہ ملک میں مہنگائی سنگل ڈیجٹ میں لے آئے تھے، تاہم ایران امریکا جنگ کے باعث مہنگائی میں اضافہ ہوا۔
کراچی میں تقریب سے خطاب کرتے ہوئے وزیر خزانہ نے کہا کہ تمام معاشی اشاریے مثبت رجحان ظاہر کررہے ہیں، ایف بی آر کی جانب سے بھی خوش آئند خبریں سامنے آئی ہیں۔
محمد اورنگزیب نے کہا کہ ایف بی آر نے ستمبر کا ہدف اور پہلی سہ ماہی کے ٹارگٹ بھی حاصل کرلیے ہیں، معاشی سمت درست ہے اور ملک پائیدار معاشی استحکام کی جانب بڑھ رہا ہے۔
ان کا کہنا تھا کہ رواں سال کے آخر تک پاکستان کی ریٹنگ بی پلس ہوجائے گی، نئی معیشت، آرٹیفیشل انٹیلی جنس اور ویب تھری پوائنٹ او پر بھی کام کرنا ہے۔
وزیر خزانہ نے کہا کہ سرمایہ کاری کے فروغ کے لیے جامع منصوبہ بندی کی جارہی ہے، بیرونی کمپنیاں پاکستان میں سرمایہ کاری میں دلچسپی ظاہر کررہی ہیں، ترکیہ اور سعودی عرب کے سرمایہ کار بھی پاکستان میں سرمایہ کاری کے لیے آرہے ہیں۔
انہوں نے کہا کہ سرمایہ کاروں کو ہر ممکن سہولتیں فراہم کررہے ہیں، ملک میں سیاسی استحکام کے لیے بیٹھ کر بات کریں اور آگے بڑھیں، ایک دن معیشت رکنے سے 120 ارب روپے کا نقصان ہوتا ہے۔
محمد اورنگزیب کا کہنا تھا کہ تنخواہ دار اور کارپوریٹ طبقہ کب تک بوجھ اٹھائے گا، اب ہمیں انفورسمنٹ کی جانب جانا ہوگا۔
وزیر خزانہ نے کہا کہ زرمبادلہ کے ذخائر بلند ترین سطح پر ہیں اور تین ماہ کی درآمدات کے مساوی ہیں، مہنگائی کو سنگل ڈیجٹ میں لے آئے تھے تاہم ایران امریکا جنگ کے باعث مہنگائی میں اضافہ ہوا۔
