اسلام آباد (پاک ترک نیوز ) نائب وزیراعظم اور وزیر خارجہ اسحاق ڈار کی زیر صدارت وزیراعظم کی خصوصی فیول ریلیف اسکیم پر قومی رہنمائی کمیٹی کا اجلاس ہوا۔ نیویارک سے واپسی کے بعد ہونے والے اجلاس میں اسکیم پر عملدرآمد، رجسٹریشن، ٹوکن کے اجرا و استعمال، ادائیگیوں اور شکایات کے ازالے کا جائزہ لیا گیا۔
اجلاس میں بریفنگ دی گئی کہ اب تک تقریباً 76 لاکھ صارفین کی کامیاب رجسٹریشن ہوچکی ہے، جبکہ فیول ریلیف اسکیم کے تحت 77 لاکھ 10 ہزار ٹوکن استعمال کیے جاچکے ہیں۔
بریفنگ کے مطابق ٹوکن استعمال کرنے کا عمل دوسرے ہفتے میں داخل ہوگیا ہے۔
اسحاق ڈار نے فیول ریلیف اسکیم کی پیش رفت اور کامیابی پر اطمینان کا اظہار کیا۔ ان کا کہنا تھا کہ فیول ریلیف اسکیم حکومت کے تمام متعلقہ اداروں کی مشترکہ اور مربوط کوششوں کا نتیجہ ہے۔
نائب وزیراعظم نے وزارت اطلاعات و نشریات، وزارت آئی ٹی و ٹیلی مواصلات، وزارت پٹرولیم، اوگرا، اسٹیٹ بینک اور صوبائی حکومتوں کی مربوط کاوشوں کو سراہا۔
اسحاق ڈار نے مستحقین کو سہولت فراہم کرنے اور ملک بھر میں خدمات کی بلا تعطل فراہمی کے لیے متعلقہ اداروں کے درمیان مسلسل رابطہ کاری یقینی بنانے پر زور دیا۔
اجلاس میں وفاقی وزرائے آئی ٹی و ٹیلی مواصلات اور اطلاعات و نشریات، معاون خصوصی طارق باجوہ، وفاقی و صوبائی سیکریٹریز اور متعلقہ اداروں کے حکام نے شرکت کی۔
