اسلام آباد (پاک ترک نیوز )وزیراعظم شہباز شریف نے کہا ہے کہ دشمن نے مسلم ممالک کے درمیان انتشار اور تقسیم پیدا کرنے کی بھرپور کوشش کی، تاہم مسلمانوں میں تفریق کی یہ سازش ناکام بنا دی گئی۔
قومی سیرت کانفرنس سے خطاب کرتے ہوئے وزیراعظم نے کہا کہ پاکستان، سعودی عرب اور ترکیے کے درمیان تاریخی مکہ دفاعی معاہدہ خطے کے امن اور اتحاد کی جانب اہم پیش رفت ہے۔ انہوں نے فیلڈ مارشل سید عاصم منیر کی امن کے لیے خدمات کو خراج تحسین بھی پیش کیا۔
شہباز شریف کا کہنا تھا کہ امن دشمن عناصر مسلم ممالک میں نفرت اور انتشار پیدا کرنے میں ناکام رہے، جبکہ بھارت کے ساتھ حالیہ جنگ کے دوران پوری قوم متحد ہو کر کھڑی رہی۔
وزیراعظم نے کہا کہ ترکیے اور سعودی عرب ایسے برادر ممالک ہیں جنہوں نے ہر مشکل اور اچھے وقت میں پاکستان کا ساتھ دیا۔ سعودی ولی عہد شہزادہ محمد بن سلمان پاکستان کے ساتھ آہنی دیوار کی طرح کھڑے ہیں۔
ان کا کہنا تھا کہ سیرت کانفرنس کی پاکیزہ روایت کو برقرار رکھنے پر علمائے کرام خراج تحسین کے مستحق ہیں۔ آج کا اجتماع اس حقیقت کی یاد دہانی ہے کہ ہم ایک ملت ہیں۔
وزیراعظم نے کہا کہ نئی نسل پوری قوم کی امیدوں کا مرکز ہے، ہم جیسی نسل تیار کریں گے ہمارا مستقبل بھی ویسا ہی ہوگا۔ نئی نسل کی بہترین تربیت اور کردار سازی قومی مستقبل کی مضبوط بنیاد ہے۔
