واشنگٹن (پاک ترک نیوز )امریکی صدر ڈونلڈ ٹرمپ نے دورہ ایران سے پہلے پاکستان کے آرمی چیف اور چیف آف ڈیفنس فورسز فیلڈ مارشل عاصم منیر سے ٹیلی فونک گفتگو کی۔
غیر ملکی خبررساں ایجنسی رائٹرز نے دو پاکستانی ذرائع کے حوالے سے بتایا ہے کہ یہ رابطہ صدر ٹرمپ کی جانب سے کیا گیا تھا، جس میں امریکا کی بنیادی درخواست تھی کہ پاکستان اپنا اثر و رسوخ استعمال کرتے ہوئے ایران کو دوبارہ مذاکرات کی میز پر لانے میں کردار ادا کرے۔
رائٹرز کے مطابق وائٹ ہاؤس کے پریس سیکرٹری کے دفتر نے اس معاملے پر تبصرے کی درخواست کا فوری جواب نہیں دیا، جبکہ فیلڈ مارشل عاصم منیر اور صدر ٹرمپ کے درمیان ہونے والی گفتگو کی دیگر تفصیلات بھی تاحال واضح نہیں ہو سکیں۔
دوسری جانب فیلڈ مارشل عاصم منیر آج ایران کے دورے پر تہران پہنچے، جہاں انہوں نے ایرانی وزیر داخلہ اسکندر مومنی سے ملاقات کی۔ ملاقات میں پاکستان کے وزیر داخلہ محسن نقوی بھی شریک تھے۔
آئی ایس پی آر کے مطابق فیلڈ مارشل عاصم منیر کا دورہ ایران علاقائی امن و استحکام کے فروغ کے لیے پاکستان کی جاری سفارتی کوششوں کا حصہ ہے۔
