کراچی(پاک ترک نیوز ) میزان بینک نے کلفٹن برج کراچی میں اپنا پہلا سروس سینٹر قائم کردیا، جہاں صارفین کو 24 گھنٹے، ہفتے کے ساتوں دن ڈیجیٹل بینکنگ سہولیات کے ساتھ ذاتی معاونت بھی فراہم کی جائے گی۔
بینک کے مطابق نئے سروس سینٹر کا مقصد صارفین کو ایک ہی جگہ پر جدید ڈیجیٹل بینکنگ خدمات اور براہ راست معاونت فراہم کرکے بینکاری کے تجربے کو مزید آسان بنانا ہے۔
کلفٹن کے مصروف تجارتی اور رہائشی علاقے میں قائم سروس سینٹر میں افراد اور کاروباری صارفین کے لیے مختلف بینکاری سہولیات دستیاب ہوں گی۔ میزان بینک کے مطابق یہ ملک میں اپنی نوعیت کی منفرد بینکاری سہولت ہے جہاں صارفین کو چیک اور کیش ڈپازٹ مشینوں کے ذریعے 24 گھنٹے، ہفتے کے ساتوں دن ورچوئل ٹیلر کی سہولت حاصل ہوگی۔
ورچوئل ٹیلر ایک ویڈیو پر مبنی بینکاری سروس ہے، جس کے ذریعے صارفین براہ راست آڈیو اور ویڈیو کے ذریعے مرکزی مقام پر موجود ٹیلر سے رابطہ کرسکتے ہیں۔ ٹیلر صارفین کی رہنمائی کے ساتھ ان مخصوص لین دین میں بھی معاونت فراہم کرتا ہے جن کے لیے عام طور پر برانچ اسٹاف کی ضرورت ہوتی ہے۔
سروس سینٹر کی افتتاحی تقریب میں میزان بینک کے صدر اور چیف ایگزیکٹو آفیسر ڈاکٹر سید عامر علی، چیف آپریٹنگ آفیسر ریٹیل اینڈ برانچ بینکنگ آپریشنز ضیا الحسن، جنرل منیجر و ہیڈ آف آپریشنز ابراہیم یعقوب سمیت بینک کی اعلیٰ انتظامیہ نے شرکت کی۔
سینٹر میں صارفین کو کیش نکلوانے اور جمع کرانے، بیلنس چیک کرنے، منی اسٹیٹمنٹ حاصل کرنے اور مقررہ حدود کے اندر فنڈز منتقل کرنے کی سہولت بھی دستیاب ہوگی۔ صارفین میزان بینک اور دیگر بینکوں کے چیکس بھی جمع کراسکیں گے، جبکہ میزان بینک کے چیکس کیش بھی کرائے جاسکیں گے۔
بینک کا عملہ صارفین کو مختلف مصنوعات سے متعلق معلومات، ڈیجیٹل بینکنگ ایکٹیویشن، سروس درخواستوں اور دیگر بینکاری معاملات میں بھی معاونت فراہم کرے گا۔
میزان بینک کے مطابق یہ سروس سینٹر بینکاری کو آسان، قابل رسائی اور صارفین کی ضروریات کے مطابق بنانے کی وسیع تر کوششوں کا حصہ ہے، جس میں واٹس ایپ بینکنگ، چیک و کیش ڈپازٹ مشینیں، ورچوئل ٹیلر، ڈیجیٹل اکاؤنٹ کھولنے اور جدید کارڈ و لائف اسٹائل سہولیات شامل ہیں۔
