لاہور (پاک ترک نیوز ) وزیراعلیٰ پنجاب مریم نواز شریف سے ملتان سے تعلق رکھنے والے ارکان صوبائی اسمبلی نے ملاقات کی، جس میں سیاسی صورتحال، عوامی فلاحی منصوبوں اور حلقہ انتخاب کے مسائل پر تفصیلی گفتگو ہوئی۔
ارکان اسمبلی نے ملتان وہاڑی دو رویہ سڑک کی تعمیر، شہر کی خوبصورتی، گلگشت برانڈ روڈ کی تعمیر و بحالی اور دیگر ترقیاتی منصوبوں پر وزیراعلیٰ مریم نواز شریف کو خراجِ تحسین پیش کیا۔
ملاقات میں ملتان شہر کے لیے جلد الیکٹروبس سروس شروع کرنے کا بھی اعلان کیا گیا۔
وزیراعلیٰ پنجاب مریم نواز شریف سے ملتان کے ارکان صوبائی اسمبلی محمد سلمان، نازک کریم اور ملک لعل محمد نے ملاقات کی۔
ملاقات میں ملتان کی سیاسی صورتحال، عوامی پراجیکٹس اور حلقوں کو درپیش مسائل پر بات چیت کی گئی۔
ارکان اسمبلی نے ملتان وہاڑی دو رویہ سڑک کی تعمیر پر وزیراعلیٰ مریم نواز شریف کا شکریہ ادا کیا، جبکہ ملتان شہر کی بیوٹیفکیشن اور گلگشت برانڈ روڈ کی تعمیر و بحالی کے اقدامات کو بھی سراہا۔
وزیراعلیٰ مریم نواز شریف نے ملتان شہر کے شہریوں کے لیے ایک اور اہم منصوبے کا اعلان کرتے ہوئے کہا کہ ملتان میں جلد الیکٹروبس سروس شروع کی جائے گی۔
وزیراعلیٰ نے کہا کہ ترقیاتی منصوبوں کا مقصد شہریوں کو محفوظ اور جدید سفری سہولتیں فراہم کرنا اور ٹریفک کے نظام کو بہتر بنانا ہے۔
مریم نواز شریف نے ارکان اسمبلی کو ہدایت کی کہ ملتان کی شہری آبادی اور دیہی علاقوں میں بھرپور شجرکاری مہم چلائی جائے، جبکہ ترقیاتی منصوبوں کی ذاتی طور پر مانیٹرنگ بھی یقینی بنائی جائے۔
وزیراعلیٰ نے کہا کہ تاریخی شہر ملتان میں سیاحتی حب بننے کی بھرپور صلاحیت موجود ہے۔
ملتان کی تاریخی اور ثقافتی اہمیت کو اجاگر کرنے کے لیے مختلف منصوبوں پر کام جاری ہے۔
مریم نواز شریف کے مطابق قلعہ کہنہ قاسم باغ سمیت دیگر تاریخی مقامات کی بحالی کے لیے اربوں روپے کے منصوبے شروع کیے گئے ہیں۔
ان منصوبوں کا مقصد ملتان کے تاریخی ورثے کو محفوظ بنانے کے ساتھ ساتھ شہر کو سیاحت کے حوالے سے بھی مزید پرکشش بنانا ہے۔
ملاقات کے دوران ارکان صوبائی اسمبلی نے پنجاب ڈویلپمنٹ پروگرام کے تحت مختلف شعبوں میں اپ گریڈیشن کے اقدامات کو بھی قابلِ تحسین قرار دیا۔
ارکان اسمبلی کا کہنا تھا کہ ترقیاتی منصوبوں سے عوام کو بنیادی سہولتوں کی فراہمی بہتر ہوگی اور ملتان میں ترقی کا عمل مزید تیز ہوگا۔
ارکان صوبائی اسمبلی نے آزاد کشمیر کے حالیہ انتخابات کا حوالہ دیتے ہوئے کہا کہ انتخابی نتائج نے ثابت کر دیا ہے کہ مسلم لیگ ن ہی پورے ملک کی مقبول اور حقیقی عوامی جماعت ہے۔
ارکان اسمبلی نے وزیراعلیٰ مریم نواز شریف کی قیادت میں پنجاب میں جاری ترقیاتی منصوبوں کو عوامی فلاح کی جانب اہم قدم قرار دیا۔
