واشنگٹن ( پاک ترک نیوز) ڈی ڈی آر 5 ریم کی قیمتوں میں غیر معمولی اضافے کے ساتھ آن لائن مارکیٹ میں خودکار اسکیلپر بوٹس کی سرگرمیاں بھی تیزی سے بڑھ گئی ہیں۔
سائبر سیکیورٹی کمپنی ڈیٹا ڈوم کے محقق کے مطابق ایک ریٹیلر کی ڈی ڈی آر 5 میموری مصنوعات کی ویب سائٹس پر آنے والی 91 فیصد ٹریفک بوٹس پر مشتمل ہے، یعنی تقریباً ہر ایک حقیقی صارف کے مقابلے میں 10 خودکار درخواستیں بھیجی جا رہی ہیں۔ڈیٹا ڈوم کی مارچ کی تحقیق میں مختلف ای کامرس ویب سائٹس پر یہ تناسب تقریباً 6 بوٹس بمقابلہ ایک حقیقی صارف تھا، تاہم اب ایک ریٹیلر کے معاملے میں یہ شرح مزید بڑھ گئی ہے۔
یہ بھی پڑھیں: پمز ہسپتال میں سی ٹی کورونری اینجیوگرافی کی سہولت غیر فعال،وزیراعظم کا نوٹس ،انکوائری کمیٹی قائم
رپورٹ کے مطابق ایک بوٹ آپریشن نے صرف ایک گھنٹے میں ڈی ڈی آر 5 کی 91 مصنوعات کی لسٹنگز کو تقریباً 551 مرتبہ فی لسٹنگ چیک کیا، یعنی تقریباً ہر 6.5 سیکنڈ بعد اسٹاک کی صورتحال معلوم کی گئی۔ان بوٹس نے کیشے میں موجود پرانے اسٹاک ڈیٹا کو نظرانداز کرنے کے لیے خصوصی پیرامیٹرز استعمال کیے اور صارفین کے ساتھ ساتھ بڑے صنعتی میموری مینوفیکچررز اور کمپوننٹ سپلائرز کی مصنوعات کو بھی مسلسل مانیٹر کیا۔
قیمتیں کہاں پہنچ گئیں؟
بوٹس کی سرگرمی ایسے وقت میں سامنے آئی ہے جب ڈی ڈی آر 5 ریم کی قیمتیں آسمان سے باتیں کر رہی ہیں۔32 جی بی ڈی ڈی آر 5-6000 کِٹ جو گزشتہ سال اوسطاً صرف 72 ڈالر میں دستیاب تھی، اب اس کی اوسط قیمت تقریباً 392 ڈالر تک پہنچ چکی ہے۔جبکہ 128 جی بی ڈی ڈی آر 5-6400 کِٹ کی قیمت بعض صورتوں میں 3 ہزار 399 ڈالر تک پہنچ گئی ہے۔ماہرین کے مطابق مصنوعی ذہانت اور ڈیٹا سینٹرز کے لیے میموری کی بڑھتی ہوئی طلب نے مارکیٹ پر شدید دباؤ ڈال دیا ہے۔ بڑے خریدار مبینہ طور پر 2027 کی ڈی آر اے ایم پیداوار کا بڑا حصہ پہلے ہی بک کرا رہے ہیں۔
عام صارف کے لیے خطرے کی گھنٹی
رپورٹ میں خبردار کیا گیا ہے کہ گرافکس کارڈز اور گیمنگ کنسولز کی طرح ریم مارکیٹ میں بھی اسکیلپر بوٹس عام صارفین کے لیے دستیاب اسٹاک کو تیزی سے مانیٹر اور خرید سکتے ہیں۔لیکن فرق یہ ہے کہ ڈی ڈی آر 5 کی طلب پوری کرنے کے لیے 2027 سے پہلے کسی بڑے پیمانے پر اسٹاک بحالی کی واضح توقع نہیں ہے۔
