اسلام آباد ( پاک ترک نیوز) پاکستان نے شام کے ابو الظہور ایئر بیس پر اسرائیلی فوج کے حملے کی شدید مذمت کرتے ہوئے اسے بین الاقوامی قوانین کی کھلی خلاف ورزی قرار دیا ہے۔
ترجمان دفتر خارجہ کے مطابق اسرائیلی حملے بلاجواز ہیں، اسرائیلی کارروائیاں خطے میں امن و استحکام کو مزید نقصان پہنچا سکتی ہیں۔
پاکستان نے شامی عوام کے ساتھ غیر متزلزل یکجہتی کا اظہار کرتے ہوئے کہا ہے کہ پاکستان شام کی خودمختاری، علاقائی سالمیت، امن اور خوشحالی کی مکمل حمایت جاری رکھے گا۔
ترجمان دفتر خارجہ نے کہا کہ عالمی برادری اسرائیل کی جانب سے بین الاقوامی قوانین کی خلاف ورزیوں کے خاتمے کے لیے اپنا کردار ادا کرے۔
یہ بھی پڑھیں: جولائی میں بجلی کی پیداوار میں 7 فیصد اضافہ
پاکستان نے مطالبہ کیا کہ اسرائیلی کارروائیوں کو روکنے اور خطے کو مزید عدم استحکام سے بچانے کے لیے عالمی برادری مؤثر اقدامات کرے۔
