باکو ( پاک ترک نیوز) آذربائیجان نے جون میں روس کو پیچھے چھوڑتے ہوئے ترکیہ کو پائپ لائن کے ذریعے قدرتی گیس فراہم کرنے والا سب سے بڑا ملک بن گیا۔
ترکیہ کی توانائی مارکیٹ ریگولیٹری اتھارٹی کے اعداد و شمار کے مطابق جون میں آذربائیجان نے ترکیہ کو تقریباً ایک ارب 10 کروڑ مکعب میٹر پائپ لائن گیس فراہم کی۔
ایران 88 کروڑ 30 لاکھ مکعب میٹر گیس کے ساتھ دوسرے جبکہ روس 88 کروڑ 20 لاکھ مکعب میٹر کے ساتھ تیسرے نمبر پر رہا۔
رواں سال کے پہلے پانچ ماہ کے دوران روس ترکیہ کا سب سے بڑا پائپ لائن گیس سپلائر تھا، تاہم جون میں آذربائیجان نے یہ پوزیشن حاصل کرلی۔
اعداد و شمار کے مطابق جون 2023 میں آذربائیجان نے ترکیہ کو 74 کروڑ 40 لاکھ مکعب میٹر، جون 2024 میں تقریباً 99 کروڑ 70 لاکھ مکعب میٹر جبکہ جون 2025 میں ایک ارب 20 لاکھ مکعب میٹر گیس فراہم کی تھی۔
ترکیہ کی مجموعی قدرتی گیس درآمدات جون میں سالانہ بنیادوں پر 6.19 فیصد کم ہوکر تقریباً 3 ارب 6 کروڑ مکعب میٹر رہیں۔
مجموعی درآمدات میں پائپ لائن کے ذریعے آنے والی گیس کا حصہ تقریباً 2 ارب 78 کروڑ مکعب میٹر رہا، جبکہ ایل این جی کی درآمدات 28 کروڑ 20 لاکھ مکعب میٹر رہیں۔ جون میں ترکیہ نے تمام ایل این جی الجزائر سے درآمد کی۔
یہ بھی پڑھیں: آبنائے ہرمز کی بندش شدید تشویش کا باعث ہے ،اردوان
گیس درآمدات میں کمی کے باوجود ترکیہ میں قدرتی گیس کی کھپت 4.59 فیصد بڑھ کر تقریباً 2 ارب 83 کروڑ مکعب میٹر ہوگئی۔
صنعتی شعبے میں گیس کی کھپت تقریباً ایک ارب 9 کروڑ مکعب میٹر رہی، بجلی کی پیداوار سمیت تبدیلی اور کنورژن کے شعبے میں 59 کروڑ 40 لاکھ مکعب میٹر جبکہ گھریلو صارفین نے تقریباً 71 کروڑ مکعب میٹر گیس استعمال کی۔
جون کے اختتام پر ترکیہ کے قدرتی گیس ذخائر تقریباً 5 ارب 27 کروڑ مکعب میٹر ریکارڈ کیے گئے۔ زیرِ زمین ذخائر میں تقریباً 4 ارب 97 کروڑ مکعب میٹر جبکہ ایل این جی ٹرمینلز میں 29 کروڑ 60 لاکھ مکعب میٹر گیس موجود تھی۔
