مری(پاک ترک نیوز )مری میں مسلم لیگ ن کا اہم اجلاس ہوا ، جس کی صدارت پارٹی کے صدر میاں نواز شریف نے کی۔ اجلاس میں وزیراعظم شہباز شریف، وزیراعلیٰ پنجاب مریم نواز اور آزاد کشمیر کے نو منتخب لیگی ارکان شریک ہوئے۔
اجلاس میں آزاد کشمیر میں حکومت سازی کے حوالے سے اہم امور پر تفصیلی مشاورت کی گئی۔ ذرائع کے مطابق اجلاس میں آزاد کشمیر کے وزیراعظم کے لیے مسلم لیگ ن کے امیدوار کے نام پر غور کیا گیا
ذرائع کے مطابق سابق وزیراعظم آزاد کشمیر راجہ فاروق حیدر، طارق فاروق اور کرنل ریٹائرڈ وقار بھی وزارت عظمیٰ کی دوڑ میں شامل ہیں۔
ذرائع کا کہنا ہے کہ مسلم لیگ ن کی پارلیمانی پارٹی نے آزاد کشمیر میں وزارت عظمیٰ کے امیدوار کے انتخاب کا اختیار میاں نواز شریف کو دے دیا ہے۔ نواز شریف تمام امیدواروں اور پارلیمانی ارکان سے مشاورت کے بعد حتمی نام کا اعلان کریں گے۔
اجلاس میں آزاد کشمیر میں مسلم لیگ ن کی حکومت کے قیام کے لیے درکار حکمت عملی، اتحادیوں سے رابطوں اور اہم عہدوں کی تقسیم سے متعلق امور بھی زیر غور آنے کا امکان ہے۔
مسلم لیگ ن کے ذرائع کا کہنا ہے کہ آزاد کشمیر میں حکومت سازی کے حوالے سے اہم فیصلے آج ہی متوقع ہیں، جبکہ وزارت عظمیٰ کے امیدوار کے نام کے اعلان کے بعد حکومت کی تشکیل کا عمل مزید تیز ہوجائے گا
