اسلام آباد ( پاک ترک نیوز) صدر مملکت آصف علی زرداری اور وزیراعظم محمد شہباز شریف نے واشک کے علاقے ماشکیل میں مزدوروں کے بہیمانہ قتل کی شدید مذمت کی ہے ۔
صدرِ مملکت آصف علی زرداری نے بلوچستان کی ضلع واشک کے علاقے ماشکیل میں معصوم مزدوروں پر دہشت گرد حملے کی شدید مذمت کرتے ہوئے کہا ہے کہ دہشت گرد حملے میں قیمتی جانوں کے ضیاع پر گہر دکھ اور افسوس ہے ، شہداء کے اہلِ خانہ سے دلی ہمدردی اور تعزیت بھی کی ۔
صدرِ پاکستان کا کہنا تھا کہ معصوم شہریوں اور محنت کش مزدوروں کو نشانہ بنانا کھلی بربریت ہے،ایسے بزدلانہ حملے قوم کے عزم کو متزلزل نہیں کر سکتے۔
صدر زرداری کا کہنا تھا کہ فتنہ الہندوستان کے دہشت گردوں اور ان کے سہولت کاروں کو قانون کے کٹہرے میں لایا جائے گا۔
صدر آصف علی زرداری نے مزید کہا کہ ریاست شہریوں کے جان و مال کے تحفظ کے لیے ہر ممکن اقدام جاری رکھے گی۔
صدرِ مملکت کی شہداء کے درجات کی بلندی، اہلِ خانہ کے لیے صبرِ جمیل کی دعا۔
یہ بھی پڑھیں: پاکستان کا مشرق وسطی میں بڑھتی ہوئی کشیدگی پر گہری تشویش کا اظہار
دوسری جانب وزیراعظم محمد شہباز شریف نے بھی بلوچستان کے ضلع واشک کے علاقے ماشکیل میں فتنہ الہندوستان کے دہشت گردوں کے ہاتھوں پانچ بے گناہ مزدوروں کے بہیمانہ قتل کی شدید الفاظ میں مذمت کی ہے۔
وزیراعظم نے شہداء کے اہلِ خانہ سے دلی ہمدردی اور تعزیت کا اظہار کرتے ہوئے کہا کہ معصوم اور نہتے مزدوروں کو نشانہ بنانا انتہائی سفاکانہ اور بزدلانہ فعل ہے، جس کی جتنی بھی مذمت کی جائے کم ہے۔
وزیراعظم شہباز شریف کا کہنا تھا کہ ایسے انسانیت سوز جرائم میں ملوث عناصر کسی رعایت کے مستحق نہیں۔ وزیراعظم نے کہا کہ فتنہ الہندوستان کے دہشت گرد اپنے مذموم عزائم کے لیے بے گناہ شہریوں کو نشانہ بنا رہے ہیں، لیکن ایسے بزدلانہ حملے دہشت گردی کے خلاف قوم کے عزم کو ہرگز متزلزل نہیں کر سکتے۔
حکومت اور سیکیورٹی فورسز ملک سے دہشت گردی کے مکمل خاتمے اور ہر شہری کے جان و مال کے تحفظ کے لیے پرعزم ہیں۔
