پاکستان کے فتح 2میزائل سسٹم کی کامیاب لانچنگ

راولپنڈی (پاک ترک نیوز )آرمی راکٹ فورس کمانڈ نے مقامی طور پر تیار کردہ فتح ٹو میزائل سسٹم کی کامیاب لانچنگ کی ہے ،میزائل جدید ایویونکس اور جدید ترین نیویگیشنل نظام سے لیس ہے۔
تربیتی لانچ کا مقصد فوجی دستوں کی تربیت، مختلف تکنیکی پہلوؤں کی جانچ، اور بہتر درستگی اور بڑھتی ہوئی بقا کی صلاحیت کے لیے شامل مختلف ذیلی نظاموں کی کارکردگی کا جائزہ لینا تھا۔
اس لانچ کا مشاہدہ اسٹریٹجک پلانز ڈویژن، آرمی راکٹ فورس کمانڈ اور پاک فوج کے سینئر افسران کے ساتھ ساتھ اسٹریٹجک اداروں کے سائنسدانوں اور انجینئرز نے کیا۔ فورم نے فتح سیریز کے مقامی طور پر تیار کردہ میزائل کے کامیاب تربیتی تجربے کو سراہا۔
صدر پاکستان، وزیر اعظم، چیف آف ڈیفنس فورسز اور سروسز چیفس نے میزائل کے کامیاب تجربے میں کردار ادا کرنے والے تمام افراد کی تکنیکی مہارت، لگن اور عزم کو سراہا۔