لاہور(پاک ترک نیوز ) جڑواں شہروں اسلام آباد اور راولپنڈی سمیت ملک کے مختلف شہروں میں موسلادھار بارش سے نشیبی علاقے زیر آب آ گئے ۔ مواصلات کا نظام درہم برہم ہوگیا ۔
لاہور سمیت پنجاب کے مختلف شہروں میں صبح سویرے ہونے والی موسلادھار بارش سے نشیبی علاقے زیر آب آگئے، کئی علاقوں میں فیڈرز ٹرپ ہونے سے بجلی کی فراہمی معطل ہوگئی، چھت گرنے سے ایک شخص جاں بحق ہوگیا۔
لاہور کے مختلف علاقوں مال روڈ، فیصل ٹاؤن، اقبال ٹاؤن، لکشمی چوک، گڑھی شاہو، چوبرجی، مزنگ، فیروزپورروڈ، سول سیکرٹریٹ، کرشن نگر، جیل روڈ، تاجپورہ، گارڈن ٹاؤن، چوک ناخدا اور کینال روڈ پر بادل برس پڑے جس سے نشیبی علاقوں میں پانی جمع ہوگیا۔لکھوڈیر میں بارش کے باعث مکان کی چھت گرنے سے ایک شخص جاں بحق ہوگیا، تین افراد کو ملبے سے نکال لیا گیا۔
دوسری جانب اسلام آباد اور راولپنڈی میں بھی بارش سے نشیبی علاقے زیر آب آگئے، وقفے وقفے سے بادل برسنے کا سلسلہ جاری ہے۔
نالہ لئی میں پانی کی سطح 10 فٹ تک بلند ہونے پر راول ڈیم میں پانی کی سطح ایک ہزار 749 فٹ ہونے پر سپل ویز کھول دیئے گئے۔
پنجاب کے دیگر شہروں فیصل آباد، بھوآنہ، خانیوال، حافظ آباد، میاں چنوں، خانیوال، مریدکے، جھنگ، کالا باغ اور دیگر علاقوں میں بھی بادل برس پڑے، کندیاں میں بارش کا پانی گلی محلوں میں جمع ہوگیا۔
ایبٹ آباد، ہری پور، صوابی اور گردونواح میں موسلادھار بارش سے ندی نالوں میں طغیانی آ گئی۔
کراچی میں کے مختلف علاقوں میں صبح سویرے بوندا باندی ہوئی، شہر میں صبح اور رات کے اوقات میں ہلکی بارش کا امکان ہے۔
نیشنل ڈیزاسٹر مینجمنٹ اتھارٹی (این ڈی ایم اے) نے الرٹ جاری کرتے ہوئے بتایا کہ ملک کے بیشتر علاقوں میں 25 جولائی تک مون سون بارشیں متوقع ہیں، جبکہ شمالی علاقہ جات میں لینڈ سلائیڈنگ اور گلاف پھٹنے کا خطرہ ہے۔
راولپنڈی اسلام آباد سمیت مختلف شہروں میں موسلادھار بارش ، نشیبی علاقے زیر آب
