اسلام آباد (پاک ترک نیوز) اسلام آباد: وزیراعظم محمد شہباز شریف سے بین الاقوامی مشاورتی فرم الویریز اینڈ مارسل (A&M) کے شمالی امریکہ آپریشنز کے منیجنگ ڈائریکٹر پیٹر بریگز نے وفد کے ہمراہ ملاقات کی، جس میں پاکستان میں اقتصادی اصلاحات، معیشت کی ڈیجیٹلائزیشن، غیر ملکی سرمایہ کاری کے فروغ اور پیداواری معیشت کے قیام پر تبادلہ خیال کیا گیا۔وزیراعظم نے کہا کہ پاکستان ادارہ جاتی اقتصادی اصلاحات، معیشت کی ڈیجیٹلائزیشن اور میرٹ و شفافیت کے فروغ کے ذریعے معاشی ترقی اور خوشحالی کے حصول کے لیے بھرپور کوششیں کر رہا ہے۔ملاقات کے دوران وزیراعظم نے پیٹر بریگز اور ان کے وفد کا خیرمقدم کرتے ہوئے اس عزم کا اعادہ کیا کہ پاکستان اپنی معیشت کو بین الاقوامی منڈیوں کے لیے مزید کھولنے اور عالمی سطح پر تسلیم شدہ اقتصادی ماہرین سے مشاورت کے لیے پُرعزم ہے۔وزیراعظم نے کہا کہ اقتصادی اور مالیاتی استحکام کا مشکل ہدف حاصل کرنے کے بعد حکومت گہری اور بنیادی نوعیت کی ادارہ جاتی و اقتصادی اصلاحات کے لیے مؤثر اقدامات کر رہی ہے، جن کا مقصد برآمدات پر مبنی ترقی کو فروغ دینا اور پیداواری معیشت کے نئے دور کا آغاز یقینی بنانا ہے۔انہوں نے کہا کہ حکومت صنعتی و پیداواری شعبے کی کارکردگی اور استعدادِ کار میں اضافے پر خصوصی توجہ دے رہی ہے، جبکہ براہِ راست غیر ملکی سرمایہ کاری (FDI) کو راغب کرنے کے لیے بھی اقدامات کیے جا رہے ہیں۔
وزیراعظم نے وفد کو بتایا کہ حکومت سرکاری ملکیتی اداروں (SOEs) کی معاشی افادیت اور پائیداری کا جائزہ لینے کے لیے فعال حکمتِ عملی پر عمل پیرا ہے۔ اس سلسلے میں قومی معیشت کی بہتری اور اقتصادی ترقی کے لیے ان اداروں کی نجکاری کا عمل بھی آگے بڑھایا جا رہا ہے۔وزیراعظم نے اس بات پر زور دیا کہ معاشی ترقی کے عمل کو مؤثر اور تیز رفتار بنانے کے لیے ماہرین کی ٹیم اور پیشہ ورانہ طور پر اہل افرادی قوت بنیادی اہمیت رکھتی ہے۔ انہوں نے کہا کہ پاکستان اقتصادی ترقی کو مزید مستحکم کرنے کے لیے مؤثر، ذمہ دار اور فعال بین الاقوامی مشاورتی اداروں کے ساتھ نتیجہ خیز اور بامعنی شراکت داری کے لیے تیار ہے۔اس موقع پر پیٹر بریگز نے ملاقات کا موقع فراہم کرنے پر وزیراعظم کا شکریہ ادا کیا اور براہِ راست غیر ملکی سرمایہ کاری کے فروغ اور عالمی اقتصادی ماہرین کے ساتھ مثبت روابط استوار کرنے کے لیے حکومت پاکستان کے عزم کو سراہا۔پیٹر بریگز نے پاکستان میں کاروبار کے لیے سازگار ماحول کے فروغ اور پیداواری معیشت کے قیام کے لیے اپنی فرم کی جانب سے پاکستان کے ساتھ مؤثر رابطہ کاری اور تعاون میں دلچسپی کا اظہار کیا۔
یہ بھی پڑھیں: کراچی: انمول عرف پنکی کے خلاف منشیات برآمدگی کیس کی سماعت، بھائی کے خاکے کی تشہیر کا حکم
ملاقات میں وفاقی وزیر خزانہ محمد اورنگزیب، وفاقی وزیر برائے اقتصادی امور احد خان چیمہ، وفاقی وزیر برائے توانائی سردار اویس احمد خان لغاری، وزیراعظم کے معاونِ خصوصی سید طارق فاطمی، وزیراعظم کے مشیر برائے نجکاری محمد علی اور دیگر اعلیٰ سرکاری حکام نے شرکت کی۔پیٹر بریگز کے ہمراہ الویریز اینڈ مارسل کے دبئی میں منیجنگ ڈائریکٹر ڈاکٹر رضا باقر، لندن میں منیجنگ ڈائریکٹر طارق حمید اور استنبول میں منیجنگ ڈائریکٹر اونور اوکوتور بھی موجود تھے۔
