اسلام آباد (پاک ترک نیوز )پاکستان نے سعودی عرب کے ریاض ایئرپورٹ پر حوثی ملیشیا کے تازہ حملے کی شدید الفاظ میں مذمت کرتے ہوئے اسے علاقائی امن و سلامتی کے لیے سنگین خطرہ قرار دیا ہے۔
ترجمان دفتر خارجہ کی جانب سے جاری بیان میں کہا گیا ہے کہ ریاض ایئرپورٹ پر حملہ ایک گھناؤنا دہشت گردانہ فعل اور بین الاقوامی قانون کی خلاف ورزی ہے۔ حملے میں جانی نقصان اور افراد کے زخمی ہونے کی اطلاعات پر پاکستان نے گہری تشویش کا اظہار کیا ہے۔
دفتر خارجہ کے مطابق پاکستان متاثرہ خاندانوں سے دلی تعزیت کرتا ہے اور زخمیوں کی جلد صحت یابی کے لیے دعاگو ہے۔ ترجمان نے کہا کہ شہری آبادی اور اہم تنصیبات کو مسلسل نشانہ بنانا ناقابل قبول ہے، عالمی برادری کو ایسے حملوں کی بلاامتیاز مذمت کرنی چاہیے اور حوثی ملیشیا کو فوری طور پر جارحانہ کارروائیاں بند کرنی چاہییں۔
پاکستان نے سعودی قیادت اور عوام کے ساتھ غیرمتزلزل یکجہتی کا اظہار کرتے ہوئے سعودی عرب کی خودمختاری، علاقائی سالمیت، سلامتی اور استحکام کے لیے اپنی حمایت کا اعادہ کیا ہے۔ ترجمان دفتر خارجہ کا کہنا ہے کہ پاکستان سعودی عرب کے دفاع، عوام کے تحفظ اور اہم تنصیبات کی سلامتی یقینی بنانے کے حق کی حمایت کرتا ہے۔
دوسری جانب وزیراعظم شہباز شریف نے بھی ریاض ایئرپورٹ پر حملے کی شدید مذمت کرتے ہوئے شہری آبادی کو نشانہ بنانے کو ناقابل قبول قرار دیا ہے۔ وزیراعظم نے سعودی عرب کے ساتھ پاکستان کی یکجہتی کا اظہار کیا ہے۔
