لاہور(پاک ترک نیوز ) پنجاب اسمبلی نے صوبے میں بجلی کی شدید لوڈشیڈنگ کے خلاف قرارداد متفقہ طور پر منظور کرلی۔ قرارداد حکومتی رکن احسن رضا نے پیش کی۔
قرارداد کے متن میں کہا گیا کہ پنجاب میں بجلی کی لوڈشیڈنگ شدید ہوچکی ہے، ایک جانب عوام لوڈشیڈنگ کا سامنا کر رہے ہیں جبکہ دوسری جانب ایک طبقے کو بجلی کے بلوں میں ریلیف دیا جارہا ہے۔
وقفہ سوالات کے دوران محکمہ توانائی سے متعلق سوالات کے جوابات منصور اعظم نے دیے۔ جواب نہ ملنے پر اپوزیشن رکن بریگیڈیئر (ر) مشتاق احمد ناراض ہوگئے۔
بریگیڈیئر (ر) مشتاق احمد نے کہا کہ اگر میرے سوال کا جواب نہیں آنا تو پھر یہاں بیٹھنے کا کوئی فائدہ نہیں۔ اسپیکر پنجاب اسمبلی نے جواب دیا کہ محترم رکن نے ابھی سوال ہی نہیں کیا، سوال کرنے سے پہلے ہی ایوان سے جانے کی باتیں کررہے ہیں۔
اسپیکر نے مزید کہا کہ بریگیڈیئر صاحب میری طرف متوجہ ہوں، آپ کی ناراضگی بلاجواز ہے۔
اپوزیشن رکن سردار محمد علی نے طنزیہ جملہ کستے ہوئے کہا کہ انرجی والی گولیاں آگئی ہیں، سیکریٹری صاحب کو انرجی والی گولیاں کھلائیں۔
اسپیکر پنجاب اسمبلی نے بتایا کہ گجرات اور گوجرانوالہ ڈویژن سمیت پورے پنجاب میں محکمہ توانائی کی سولرائزیشن کی متعدد اسکیمیں جاری ہیں۔
بعد ازاں کورم پورا نہ ہونے کے باعث پنجاب اسمبلی کا اجلاس پیر کو دوپہر 2 بجے تک ملتوی کردیا گیا۔
