اسلام آباد ( پاک ترک نیوز) وزیراعظم شہباز شریف نے پمز اسپتال کی نرسری میں آتشزدگی کے نتیجے میں نومولود بچوں کے جاں بحق ہونے کے واقعے پر گہرے دکھ اور افسوس کا اظہار کیا ہے۔وزیراعظم نے واقعے کا نوٹس لیتے ہوئے فوری تحقیقات کی ہدایت کردی۔ انہوں نے کہا کہ بچوں کے ساتھ ایسی صورتحال ناقابلِ تلافی ہے، آتشزدگی کے محرکات کا تفصیلی جائزہ لیا جائے اور ذمہ داران کا تعین کرکے سخت سے سخت کارروائی عمل میں لائی جائے۔
شہباز شریف نے جاں بحق نومولود بچوں کے لواحقین سے تعزیت کرتے ہوئے کہا کہ اس اندوہناک واقعے پر دل رنجیدہ ہے، والدین کے اس دکھ میں برابر کے شریک ہیں۔ اللہ تعالیٰ جاں بحق بچوں کے لواحقین کو صبر جمیل عطا فرمائے۔وفاقی وزیر داخلہ محسن نقوی نے بھی پمز اسپتال میں آتشزدگی کے واقعے پر گہرے دکھ اور افسوس کا اظہار کیا ہے۔ انہوں نے جاں بحق بچوں کے لواحقین سے دلی ہمدردی اور تعزیت کرتے ہوئے کہا کہ پمز اسپتال میں انتہائی دلخراش اور افسوسناک واقعہ پیش آیا۔
یہ بھی پڑھیں: اسلام آباد، پمز اسپتال کی نرسری میں آتشزدگی، 14 نومولود بچے جاں بحق
محسن نقوی نے کہا کہ ہماری تمام تر ہمدردیاں غمزدہ خاندانوں کے ساتھ ہیں اور دکھ کی اس گھڑی میں جاں بحق بچوں کے لواحقین کے ساتھ کھڑے ہیں۔دوسری جانب وزیراعلیٰ سندھ مراد علی شاہ نے بھی پمز اسپتال اسلام آباد میں آتشزدگی کے واقعے پر افسوس کا اظہار کیا۔ انہوں نے کہا کہ معصوم نومولود بچوں کی ہلاکت کی خبر انتہائی افسوسناک اور دل دہلا دینے والی ہے۔
مراد علی شاہ نے قیمتی انسانی جانوں کے ضیاع پر دلی تعزیت کا اظہار کرتے ہوئے دعا کی کہ رب کائنات متاثرہ خاندانوں کو ناقابلِ تلافی صدمہ برداشت کرنے کا حوصلہ عطا فرمائے۔ وزیراعلیٰ سندھ نے واقعے میں زخمی ہونے والوں کی جلد صحتیابی کے لیے بھی دعا کی۔
