بیجنگ (پاک ترک نیوز )ایران کے خلاف امریکی صدر ڈونلڈ ٹرمپ کی جانب سے مزید اقتصادی دباؤ اور پابندیوں کی دھمکیوں پر چین کا سخت ردعمل سامنے آگیا۔
چینی وزارت خارجہ نے امریکی پابندیوں اور اقتصادی دباؤ کی پالیسی پر تنقید کرتے ہوئے کہا ہے کہ ایران پر مزید پابندیاں عائد کرنے یا دباؤ بڑھانے سے مسائل حل نہیں ہوں گے۔
چینی حکام نے تمام متعلقہ فریقین پر زور دیا ہے کہ وہ ذمہ دارانہ رویہ اختیار کریں اور اختلافات کو طاقت، دباؤ یا پابندیوں کے بجائے سفارتی اور سیاسی ذرائع سے حل کرنے کی کوشش کریں۔
چینی وزارت خارجہ کے ترجمان کا کہنا ہے کہ یکطرفہ پابندیاں اور زیادہ سے زیادہ دباؤ کی پالیسی مسائل کے حل میں معاون نہیں، بلکہ صورتحال کو مزید پیچیدہ بنا سکتی ہے۔
ماہرین کے مطابق ایران کے خلاف امریکی پابندیوں میں مزید سختی کی صورت میں چین کی معیشت اور توانائی کی ضروریات بھی متاثر ہوسکتی ہیں، کیونکہ چین ایران کے خام تیل کا سب سے بڑا خریدار ہے۔
