راولپنڈی (پاک ترک نیوز )بنوں اور ملحقہ علاقوں میں سکیورٹی فورسز کے انٹیلی جنس بیسڈ آپریشنز، 24 دہشت گرد ہلاک ہو گئے ، آئی ایس پی آر کے مطابق بنوں میں حالیہ دہشت گرد حملوں کے بعد سیکیورٹی فورسز کی کارروائیاں مزید تیز کر دی گئیں ۔
آئی ایس پی آر کے مطابق بھارتی پراکسی فتنہ الخوارج کے 24 دہشت گرد گزشتہ 24 گھنٹوں میں مارے گئے، ہلاک دہشت گردوں سے بھاری مقدار میں اسلحہ اور گولہ بارود برآمد کر لیا گیا۔
آئی ایس پی آر کے مطابق ہلاک دہشت گرد متعدد کارروائیوں اور شہریوں کے قتل میں ملوث تھے، بنوں میں گاڑی میں نصب خودکش بم حملے کے ذمہ دار عناصر کے خلاف آپریشن جاری ہے۔
آئی ایس پی آر کے مطابق دہشت گردوں اور ان کے سہولت کاروں کو انجام تک پہنچایا جائے گا،سکیورٹی فورسز اور قانون نافذ کرنے والے اداروں کی انسداد دہشت گردی مہم بلا تعطل جاری ہے ،عزمِ استحکام کے تحت ملک سے دہشت گردی کے مکمل خاتمے تک کارروائیاں جاری رہیں گی۔
