اسلام آباد(پاک ترک نیوز ) محکمہ موسمیات نے ملک کے مختلف علاقوں میں آج سے 12 جون تک شدید گرمی اور ہیٹ ویو کی لہر کے حوالے سے خبردار کرتے ہوئے شہریوں کو احتیاطی تدابیر اختیار کرنے کی ہدایت کی ہے۔
محکمہ موسمیات کے مطابق آنے والے دنوں میں ملک کے بیشتر میدانی علاقوں میں درجہ حرارت معمول سے کئی ڈگری زیادہ رہنے کا امکان ہے، جس کے باعث گرمی کی شدت میں نمایاں اضافہ متوقع ہے۔
محکمہ موسمیات کا کہنا ہے کہ کراچی سمیت سندھ کے مختلف شہروں میں درجہ حرارت 40 سے 43 ڈگری سینٹی گریڈ کے درمیان رہ سکتا ہے، جبکہ اندرونِ سندھ اور بلوچستان کے بعض اضلاع میں پارہ 48 سے 51 ڈگری سینٹی گریڈ تک پہنچنے کا خدشہ ہے، جو انسانی صحت کے لیے خطرناک ثابت ہوسکتا ہے۔
پنجاب کے متعدد اضلاع میں بھی شدید گرمی کی لہر برقرار رہے گی اور درجہ حرارت 44 سے 48 ڈگری سینٹی گریڈ تک جانے کا امکان ہے۔ اسی طرح خیبرپختونخوا کے میدانی علاقوں میں درجہ حرارت 41 سے 46 ڈگری سینٹی گریڈ تک پہنچ سکتا ہے۔
ماہرین موسمیات کے مطابق گرمی کی اس شدید لہر کے باعث ہیٹ اسٹروک، پانی کی کمی، تھکن اور دیگر موسمی بیماریوں کے خطرات بڑھ سکتے ہیں، خاص طور پر بچوں، بزرگوں اور کھلے آسمان تلے کام کرنے والے افراد کو زیادہ احتیاط کی ضرورت ہے۔
محکمہ موسمیات نے شہریوں کو مشورہ دیا ہے کہ وہ صبح 10 بجے سے شام 4 بجے تک غیر ضروری طور پر دھوپ میں نکلنے سے گریز کریں، زیادہ سے زیادہ پانی اور مشروبات کا استعمال کریں اور ہلکے رنگ کے سوتی کپڑے پہنیں۔
دوسری جانب صوبائی اور ضلعی انتظامیہ کو بھی ہدایت کی گئی ہے کہ ممکنہ ہیٹ ویو کے پیش نظر طبی سہولیات اور ہنگامی اقدامات کو یقینی بنایا جائے تاکہ کسی بھی ناخوشگوار صورتحال سے بروقت نمٹا جا سکے۔
ماہرین کا کہنا ہے کہ موسمیاتی تبدیلیوں کے باعث پاکستان میں شدید گرمی کی لہروں کی شدت اور دورانیہ بڑھ رہا ہے، جس کے باعث عوام کو احتیاطی تدابیر اختیار کرنے کی اشد ضرورت ہے۔
محکمہ موسمیات نے خبردار کیا ہے کہ اگر موجودہ موسمی صورتحال برقرار رہی تو بعض علاقوں میں درجہ حرارت مزید بڑھ سکتا ہے، لہٰذا شہری سرکاری ہدایات پر عمل کریں اور اپنی صحت کا خصوصی خیال رکھیں۔
